BQXK nümayəndələri əsirlikdə olan Azərbaycan hərbçiləri ilə görüşüblər

Bu barədə APA-ya BQXK-nın Bakı ofisinin yayım şöbəsinin rəhbəri İlahə Hüseynova məlumat verib. Onun sözlərinə görə, BQXK-nın Ermənistan nümayəndəliyinin əməkdaşları dekabrın 16-da erməni əsirliyində olan iki Azərbaycan hərbçisinə baş çəkiblər. Beynəlxalq qurumun nümayəndələri həmin şəxslərin saxlanma şəraiti və fiziki durumu ilə maraqlanıblar. İ. Hüseynova, həmçinin bildirib ki, hər iki hərbi ailəsinə məktub göndərib və həmin məktublar artıq əsirlərin ailələrinə çatdırılıb.

Erməni əsirliyində olan Azərbaycan Ordusunun kiçik çavuşu Anar Hacıyev ailəsinə göndərdiyi məktubda hər şeyin yaxşı olduğunu yazıb. Bu barədə APA-ya hərbi əsirin anası Nailə Məmmədova məlumat verib. Onun sözlərinə görə, Anar Hacıyev məktubu bu gün ailəsinə çatdırılıb. Məktubda yazılır: “Salam ay ana. Necəsiz? Məndən nigaran olmayın, mən yaxşıyam. Qarşıdan gələn yeni ilinizi təbrik edirəm. Hamıya salam deyin”.

Qeyd edək ki, erməni əsirliyində olan Azərbaycan Ordusunun kiçik çavuşları Roman Hüseynov bu il avqustun 27-də, Anar Hacıyev isə 2009-cu il mayın 10-da Ermənistan Silahlı Qüvvələri tərəfindən əsir götürülüb.