İsraildə naməlum uçan obyekt vurulub

Lent.az-ın “The Yerusalem Post” qəzetinə istinadən verdiyi məlumata görə, obyekt Dimon şəhərindəki atom reaktoru yaxınlığında aşkarlanıb.

İsrail Müdafiə Nazirliyinin yaydığı məlumata görə, bu, mühərriklə təchiz edilmiş pilotsuz obyektdir. Dekabrın 16-da obyekt Ölü dənizdə qadağan olunmuş zona üzərində uçub, sonra isə tədricən Dimon şəhərindəki atom mərkəzinə istiqamətlənib.

Obyektin mənşəyi və təyinatı hələ məlum deyil. İsrail hərbçilərinə görə, şara oxşayan bu şübhəli obyektin fəzada sürətlə hərəkət edən kosmik mənşəli qızmar cisim olması da istisna deyil. Aparatın İsrailin atom proqramı ilə bağlı məlumat əldə etməyə çalışan xüsusi xidmət orqanlarından birinə məxsus olması da versiyalar sırasındadır.

Dimon kompleksində 200 atom bombasının olduğu ehtimal edilir. Dimondakı reaktor üzərində uçuşlar qadağan edilib. Kompleks “Yer-Hava” tipli raket sistemləri ilə qorunur.