Bakıda avtomobilləri qarət edən dəstə ələ keçib

Bu barədə Lent.az-a Bakı şəhər Baş Polis İdarəsindən bildirilib.

Məlumata görə, Səbail rayon Polis İdarəsinin 8-ci Polis Bölməsi əməkdaşlarının keçirdiyi əməliyyat tədbirləri nəticəsində avtomobillərdən oğurluq etməkdə şübhəli bilinən Cəlal Ağayev və Həmid İsgəndərov dekabrın 6-da saxlanılıblar.

Araşdırmalar nəticəsində müəyyən edilib ki, saxlanılan şəxslər bu ilin sentyabr, oktyabr, noyabr və dekabr aylarında Badamdar qəsəbə sakini Emin Əmirxanova, Fərrux Abbasova, Sənan İbrahimova, Abdulla Abdullaha, Aslan Aqraxova məxsus “VAZ-2107” markalı, Pünhan Şükürova, Nuru Quliyevə məxsus “VAZ-2106” markalı və Azər Hüseynova məxsus “VAZ-21013” markalı avtomobillərdən səsgücləndirici, maqnitofon, akkumulyator, təkər, qaldırıcı qurğular və digər əşyalar oğurlayıblar.

Faktla bağlı cinayət işi başlanıb. Hazırda polis həmin şəxslərin digər cinayətlərinin olub-olmadığını araşdırır.

Hafiz Heydərov