“Azercell”dən oğurluq edən şəxslər saxlanılıb

Bunlar Quba rayon sakini Ayaz Mahmudov, Beyləqan rayon sakini Elmir Rüstəmov və Zərdab rayon sakini Rəşad Kərimovdur. Onlar Quba rayonun Qam-Qam və Hacıhüseynli kəndlərinin ərazisində yerləşən mobil radiobazaların hərəsindən 100 metr ildırımötürücü kimi istifadə olunan mis məftil oğurlayıb.

Quba RPŞ-nin müstəntiqi Rövşən Turabovun Lent.az-a verdiyi məlumata görə, həmin şəxslər bir müddət əvvəl Şabran rayonunun Rəhimli kəndində yerləşən radiobazalardan dəyəri 4500 ABŞ dolları olan mis məftil də oğurlayıb. Həmin vaxt Şabran RPŞ-nin əməkdaşları həmin şəxsləri yaxalayıb. Onlar oğurladıqları məftilləri 200 manata satdıqlarını etiraf ediblər. 2010-cu il oktyabr ayında keçirilən məhkəmə zamanı həmin şəxslər cərimə olunaraq azadlığa buraxılıblar. Quba RPŞ-nə daxil olan müraciətdən sonra isə onların Quba rayonunda oğurluq etdiklərinin üstü açılıb. Faktla bağlı Quba RPŞ-də araşdırmalar davam etdirilir.

Vəli Turan