Sərhədi qanunsuz keçən şəxs xəstəxanada öldü

Oktyabrın 27-də saat 20 radələrində Azərbaycan-Gürcüstan sərhədini qanunsuz keçən gürcü əsilli şəxs ölüb. Qazax rayon hüquq-mühafizə orqanlarından Lent.az-a verilən məlumata görə, şəxsiyyəti məlum olmayan 55-60 yaşlı gürcü əsilli kişi sərhədi qanunsuz yolla keçib və Azərbaycan Milli Ordusunun N saylı hərbi hissəsinin ərazisinə gəlib çıxıb. Burada postun ərazisinə daxil olan naməlum şəxs saxlanılıb.

Bir müddət sonra özünü pis hiss edən həmin şəxs Qazax rayon Mərkəzi Xəstəxanasına yerləşdirilib. Lakin həkimlərin səylərinə baxmayaraq, sərhədi qanunsuz keçmiş kişinin həyatını xilas etmək mümkün olmayıb. İlkin ehtimala görə, o, ürək tutmasından dünyasını dəyişib.

Həmin şəxs saxlanılan zaman gürcü milliyyətindən olduğunu deyib və əsgərlərlə gürcü dilində danışıb. Onun şəxsiyyətinin müəyyənləşdirilməsi istiqamətində iş aparılır.

Nizam Rza