Baş Prokurorluqdan rayon və şəhər prokurorlarına müraciət

APA-nın məlumatına görə, müraciət prokurorluq orqanlarının Kütləvi İnformasiya Vasitələri ilə münasibətlərin təkmilləşməsi və əlaqələrinin gücləndirilməsinə yönəlib.
Müraciətdə informasiya azadlığının təmin edilməsi sahəsində prokurorluq orqanları tərəfindən həyata keçirilən tədbirlərin səmərəliliyinin artırılması, ictimaiyyətlə, eləcə də kütləvi informasiya vasitələri və qeyri-hökumət təşkilatları ilə əlaqələrin daha da təkmilləşdirilməsi tövsiyə olunur.

Müraciətdə, həmçinin cəmiyyətdə geniş əks-səda doğuran və xüsusi maraq kəsb edən cinayət işlərinin istintaqı barədə ictimaiyyətin məlumatlandırılması məqsədilə kütləvi informasiya vasitələrinə, habelə televiziya kanallarına müsahibə verərkən Baş Prokurorluq üzrə müvafiq əmrin tələblərinə ciddi riayət edilməsinin zəruriliyi vurğulanıb. Sorğu edilən məsələlərlə əlaqədar televiziya kanallarına müsahibələrin verilməsi yalnız ictimaiyyətlə, kütləvi informasiya vasitələri və qeyri-hökumət təşkilatları ilə əlaqələrə görə məsul olan prokurorluq işçiləri tərəfindən Baş Prokurorluğun mətbuat xidməti ilə razılaşdırılmaqla məqsədə uyğundur. Cinayət işləri üzrə edilən sorğularla bağlı istintaqın aparılmasına xələl gətirən və istintaq sirri təşkil edən məlumatların yayılması hallarına yol verilməməsi, o cümlədən təqsirsizlik prezumpsiyası prinsipinə, ailə, dövlət, kommersiya və qanunla mühafizə olunan digər sirlərin qorunmasına dair qanunvericiliyin tələblərinə dönmədən əməl edilməsi tələb olunur.

Xatırladaq ki, bir müddət əvvəl Baş Prokurorluğun veb saytının yenilənmiş variantının təqdimatı keçirilib. Saytın yeni versiyasında Baş Prokurorluğun rəhbərliyinin, eləcədə KİV-lə əlaqələrə görə məsul şəxslərin əlaqə telefonlarını özündə əks etdirən xüsusi bölmə yaradılıb. Buda öz növbəsində prokurorluq orqanlarının KİV-lə, habelə bütövlükdə ictimaiyyətlə əlaqələrinin səmərəliliyinin artırılmasına və inkişaf etdirilməsinə xidmət edir.