Küçədə içib yatan “bomj”un faciəvi sonu

Oktyabrın 20-də saat 10:20 radələrində Hacıqabul rayonunda yanmış kişi meyiti tapılıb. Lent.az-ın məlumatına görə, Şirvan şəhər sakini, 1963-cü il təvəllüdlü Ağalarov Mirhadı Əli oğlunun meyiti Hacıqabul gölünün yaxınlığında aşkarlanıb.

İlkin tədqiqat zamanı həmin şəxsin tüfeyli həyat tərzi keçirdiyi və küçələrdə, yol kənarlarında gecələdiyi məlum olub. Meyit aşkarlanarkən yanında araq butulkası da tapılıb. İlkin araşdırma nəticəsində mərhumun bir qədər alkoqollu içki qəbul edəndən sonra tonqal qalayaraq gölün kənarında yatdığı üzə çıxıb. M.Ağalarov yuxuya gedəndən sonra alov böyüyüb və yaxınlıqdakı benzin qabına keçib. Nəticədə içkili şəxsin paltarı od tutub və o, yanaraq, ölüb.

Faktla bağlı araşdırma davam etdirilir. Meyiti götürməyə gələn yaxınları 47 yaşlı mərhumun 20-30 ildən çoxdur, evə gəlmədiyini bildiriblər.

Nizam Rza