Qubadakı kütləvi məzarlıqda aşkarlanan insan sümükləri basdırılmayacaq

Qubada aşkar edilən kütləvi məzarlıqdakı insan sümükləri basdırılmayacaq. Lent.az-ın məlumatına görə, həmin ərazidə piramida şəklində abidə qurulacaq.

Tikiləcək memorial kompleksin həyətində erməni terrorunun qurbanlarının xatirəsini əbədiləşdirmək məqsədi ilə simvolik məzar daşları qoyulacaq. Artıq kompleksin tikintisinə başlanılıb. Hələlik işlərin təməlqoymaya qədər olan hissəsi davam etdirilir.

Eyni zamanda, Qudyalçayın məcrasında bəndqurma işləri də davam etdirilir. Tikinti işlərini həyata keçirən “Aykon” şirkətindən Lent.az-a verilən məlumata görə, tikinti işləri bir neçə mərhələdə həyata keçirilir. Kompleksin layihəsinə gəldikdə isə bu, piramida şəkilli bir abidə olacaq. Onun hündürlüyü müəyyən nöqtələrdə 18, bəzi hissələrdə 24 metr olacaq. Kompleksin tikintisi H.Əliyev fondu tərəfindən maliyyələşdirilir.

Vəli Turan