Sumqayıtdakı qətlin təfərrüatları məlum olub

Sentyabrın 17-ə keçən gecə Sumqayıtda baş verən qətlin səbəbi məlum olub. Lent.az-ın məlumatına görə, Respublika Baş Prokurorluq hadisə ilə bağlı rəsmi məlumat yayıb.

Məlumatda göstərilir ki, hadisə oğul Elxan Hacıyevin məhəllədə qonşularla davasından başlayıb. Elxan Hacıyev atasının da içində idarə etdiyi “VAZ-2107” markalı maşınla sərxoş vəziyyətdə evə qayıdarkən maşını küçədə saxladığı üçün qonşuları Emil və Ramin Məmmədov qardaşları ilə mübahisə ediblər. Mübahisə zamanı Elxan Hacıyev avtomobildən götürdüyü bıçaqla Ramin Məmmədovun sol qol nahiyəsinə xəsarət yetirib. Bu zaman Rasim Hacıyev oğlunu sakitləşdirmək istəyərkən Elxan atasını da sağ bud nahiyəsindən yaralayıb. Xəsarət güclü qanaxma ilə müşayiət olunduğundan Elxan Hacıyev atasını şəhər Təcili Tibbi Yardım Xəstəxanasına aparıb, lakin həkimlərin göstərdikləri səyə baxmayaraq Rasim Hacıyevin həyatını xilas etmək mümkün olmayıb.

Sumqayıt şəhər Polis İdarəsinin əməkdaşları tərəfindən həyata keçirilən təxirəsalınmaz istintaq-əməliyyat tədbirləri nəticəsində Elxan Hacıyev sentyabrın 17-də saat 03:00 radələrində şübhəli şəxs qismində tutularaq istintaqa təqdim edilmişdir.
Hazırda iş üzrə istintaq şəhər prokurorluğunda davam etdirilir.

Vüqar Baba