Lənkərandakı partlayışda 3 maşın külə dönüb

Lənkəranda baş vermiş partlayışda 3 maşın yanıb. Lent.az-ın Fövqəladə Hallar Nazirliyinə istinadən verdiyi məlumata görə, partlayış nəticəsində ətrafdakı binalara da zərər dəyib.

Sentyabrın 17-də Lənkəran-Astara magistral yolunun Lənkəran rayonu, Digah kəndi ərazisindən keçən hissəsində vətəndaşa aid maye qaz və benzin yanacaqdoldurma məntəqəsində yanğınla davam edən partlayış hadisəsi baş verib. Nəticədə, hər birinin həcmi 50 kub metr olan 2 ədəd maye qaz çəni, yanacaqla dolu 16 ton maye qaz daşıyan “Kamaz” markalı yük avtomobilinin, “VAZ” markalı minik avtomobilinin və “Belorus” markalı traktoru tamamilə yanıb.

Həmçinin, yanğın yanacaqdoldurma məntəqəsinə bitişik yerləşən çayxanaya və yaxınlıqdakı “Bakcell” şirkətinə məxsus ötürücü antenaya da keçib.

Hadisə zamanı yanacaqdoldurma məntəqəsində olan 3 nəfər məntəqə işçisi müxtəlif dərəcəli yanıq xəsarətləri alıb. Yaralılar xəstəxanaya aparılıb.

Partlayış zamanı “Kamaz” markalı avtomobilin çəninin qəlpələri yaxınlıqda yerləşən ayrı-ayrı vətəndaşlara aid birmərtəbəli və ikimərtəbəli evlərin dam örtüklərini dağıdıb.

Həmin ərazidə yerləşən həcmi 50 kub metr olan 1 ədəd maye qaz çəni, həcmi 15 ton olan 1 ədəd yeraltı yanacaq çəni və yaxınlıqdakı fərdi yaşayış evləri yanğınsöndürənlər tərəfindən yanğından mühafizə olunub. Yanğın saat 07:21-də yanğınsöndürənlər tərəfindən söndürülüb. Hadisə ilə əlaqədar müvafiq qurumlar tərəfindən araşdırma aparılır.