FHN cənub bölgəsində irimiqyaslı təlim keçirib

APA-nın cənub bürosunun məlumatına görə, təlim bu gün Lənkəran rayonunun Liman şəhəri ərazisindəki neft anbarında reallaşıb. Mərkəzin əməkdaşlarına şərti olaraq Lənkəran şəhərindən 75 kilometr aralıda 7,5 bal gücündə baş verən zəlzələnin fəsadlarını dəf etmək tapşırığı verilib. Zəlzələ nəticəsində Liman şəhərində yerləşən neft anbarındakı çənin deformasiyaya uğraması səbəbindən yanğın baş verib, inzibati bina uçub, işçilərdən xəsarət alanlar olub. Hadisə yerinə təcili olaraq FHN-in Cənub Regional Mərkəzinin əməkdaşları gəlib.

Anbarda baş verən yanğının qarşısı alınıb, xəsarət alan 2 nəfər Lənkəran Mərkəzi Rayon Xəstəxanasına çatdırılıb.

FHN-nin əməkdaşı İzzət İbadov jurnalistlərə açıqlamasında şərti təlimin keçirilməsində məqsədin baş verə biləcək hər hansı hadisəyə çevik reaksiya vermək, FHN-lə aidiyyəti qurumlar arasında qarşılıqlı əlaqəni gücləndirmək, operativ qərarların qəbul edilməsi, qəza xilasetmə və digər təxirəsalınmaz işlərin təşkili olduğunu deyib, belə tədbirlərin davam etdiriləcəyini bildirib.

Təlimə şəxsi heyətin 74 üzvü, o cümlədən 9 texnika cəlb edilib.