Qatarın partladılması barədə rəsmi açıqlama yayıldı

“Azərbaycan Dəmir Yolları” QSC-nin mətbuat katibliyinin rəisi Nadir Əzməmmədov Lent.az-a bildirib ki, bu gün Bakı vaxtı ilə saat 12.20-də Şimali Qafqaz dəmir yolunda Kizlər stansiyası yaxınlığında yük qatarının hərəkəti zamanı partlayış baş verib. İlkin məlumata görə, qatarın 5 vaqonu relsdən çıxıb. Hadisə nəticəsində ölən və yaralanan yoxdur.

Partlayış Həştərxandan Bakıya gələn qatarın sonuncu vaqonunun altında baş verib və nəticədə hər iki istiqamətdə hərəkət dayandırılıb. Hadisə yerində hüquq-mühafizə orqanlarının əməkdaşları işləyirlər.

Nadir Əzməmmədov deyib ki, dünən Bakı-sərnişin stansiyasından yola düşən Bakı-Moskva qatarı hazırda Kizlər stansiyasında, Sankt-Peterburqdan Bakıya gələn sərnişin qatarı isə Artezian stansiyasında dayanıb. Hər iki qatarın sərnişinləri avtobuslarla Artezian və Kizlər stansiyalarına daşınacaq, Bakı-Moskva qatarı Sankt-Peterburq-Bakı qatarının sərnişinlərini Bakıya, Sankt-Peterburq-Bakı qatarı isə Bakı-Moskva qatarının sərnişinlərini Moskvaya aparacaq.

Bu gün Bakı-Tümen qatarı səhər saat 06.20-də yola düşüb, Bakı-Kiyev sərnişin qatarı isə saat 23.40-da cədvəl üzrə yola düşəcək.

Elxan SALAHOV