Azərbaycan Rusiya gəmisinə görə milyon dollar istəyir – EKSKLÜZİV

Apellyasiya Məhkəməsi əvvəlki instansiya məhkəməsinin qərarını qüvvədə saxlayıb

Bakı Apellyasiya Məhkəməsində Rusiyanın “Naviqator” Qapalı Səhmdar Cəmiyyətinin (QSC) 2 saylı Bakı Yerli İqtisad Məhkəməsinin qərarından verdiyi apellyasiya şikayətinə baxılıb. Lent.az-ın müxbiri xəbər verir ki, Xəzər Dəniz Neft Donanması “Naviqator”a qarşı iddia qaldırıb, birinci instansiya məhkəməsi iddianı təmin edib. QSC isə qərarla razılaşmayaraq, apellyasiya şikayəti verib.

Bakı Apellyasiya Məhkəməsinin hakimi Vaqif Mursaqulovun sədrliyilə keçirilən prosesdə “Naviqator” QSC-dən nümayəndə iştirak etməyib. Hakim bildirib ki, QSC-nin nümayəndəsinə dəvət göndərilib, hətta telefon zəngi də edilib. Beləliklə, proses QSC nümayəndəsinin iştirakı olmadan keçirilib.

Prosesdə iştirak edən Xəzər Dəniz Neft Donanmasının hüquqi nümayəndəsi “Naviqator” QSC-yə məxsus “Sarmat-1” yük gəmisi təhlükə ilə üzləşərkən Rusiyanın müvafiq qurumlarının Azərbaycan tərəfinə müraciət etdiyini bildirib. O, hadisənin təfsilatı barədə danışaraq Azərbaycan tərəfinin “Sarmat-1” gəmisi ilə bağlı xilasetmə işlərini həyata keçirməsi barədə məlumat verib. Rusiya tərəfi isə gəmiyə çəkilən xərcləri ödəmədiyindən “Sarmat-1”ə və onun içərisindəki yükə həbs qoyulub.

Onu da bildirək ki, gəmiyə və yükə həbs qoyulması barədə Azərbaycan mətbuatı hadisələr cərəyan edən vaxt xəbər vermişdi. Lakin Azərbaycan tərəfinin “Sarmat-1” gəmisinə görə nə qədər vəsait tələb etdiyi məlum deyildi. Bakı Apellyasiya Məhkəməsində keçirilən proses zamanı bu rəqəm açıqlanıb. Belə ki, Xəzər Dəniz Neft Donanması məhkəmədən qarşı tərəfin hesabından 850 min avro (təxminən 1 milyon dollar) tutularaq onların hesabına köçürülməsini istəyib. 2 saylı Bakı Yerli İqtisad Məhkəməsi iddianı təmin edib.

Bakı Apellyasiya Məhkəməsi əvvəlki instansiya məhkəməsinin qərarını qüvvədə saxlayıb.

Pərvin ABBASOV