Belarusda partlayıcı qurğu düzəldən azərbaycanlıya hökm oxunub

O, bu işi hərbi xidmətdə olarkən öyrəndiyini deyib

Belarusun Brest şəhər məhkəməsi Minskdə Müstəqillik Günü baş vermiş partlayışla əlaqələndirilən cinayət işi üzrə hökm oxunub.

Lent.az-ın məlumatına görə, müttəhimlər kürsüsündə oturan 25 yaşlı iki gəncdən biri Azərbaycan vətəndaşıdır. İttihamnamədə onun ötən ilin iyununda kriminal qurumların sifarişi ilə partlayıcı qurğu hazırladığı bildirilir.

Belarusun ONT telekanalının yaydığı məlumata görə, o, partlayıcı hazırlamaq bacarığına Azərbaycan Sərhəd qoşunlarında hərbi xidmətdə olarkən yiyələnib. Əlavə məlumatları isə internetdə tapıb. O, təhlükə mənbəyi olan qurğuları evində hazırlayırmış.

İstintaqın gedişində bəlli olub ki, belə təhlükəli əməllə məşğul olsa da, nə “usta” azərbaycanlının, nə də vasitəçi Belarus vətəndaşının Minskdəki partlayışla heç bir əlaqəsi yoxdur.

Bundan sonra İbrahimov soyadlı Azərbaycan vətəndaşı cəzasını ciddi rejimli İƏM-də çəkməklə 2 il, Brest sakini isə 4 il müddətinə azadlıqdan məhrum ediliblər.