Sumqayıtda bir gündə iki intihar

Fevralın 15-də Azərbaycanın Sumqayıt şəhərində iki nəfər özünü öldürüb.

Sumqayıt şəhər Polis İdarəsindən APA-ya verilən məlumata görə, intihar hadisələrindən biri şəhərin 2-ci məhəlləsində yerləşən “Lalə” kafesinin yanında qeydə alınıb. Sumqayıt şəhər sakini, 50 yaşlı Azad Rəşid oğlu Səfərov özünü ağacdan asaraq, intihar edib. Onun tüfeyli həyat tərzi keçirdiyi bildirilir.

Başqa bir intihar hadisəsi isə Sumqayıt şəhərinin Corat qəsəbəsində baş verib. Qəsəbə sakini, 1977-ci il təvəllüdlü Zahid Hacıqulu oğlu Quliyev özünü yaşadığı evin həyətindəki yardımçı tikilinin tirindən kəndirlə asıb. Mərhumun özünü öldürməsinin səbəbləri hələlik məlum deyil. Hər iki fakt üzrə Sumqayıt şəhər Prokurorluğu tərəfindən Cinayət Məcəlləsinin 125-ci (özünü öldürmə həddinə çatdırma) maddəsi ilə cinayət işi başlanıb, araşdırma aparılır.

Qeyd edək ki, son iki gündə Bakı şəhərində də üç intihar hadisəsi qeydə alınıb.