Həmid Herisçi İrana köçdü

Yazıçı, şair, publisist Həmid Herisçi İrana köçüb. Bu barədə Lent.az-a onun yaxınlarından biri məlumat verib. “O, Cənubi Azərbaycana birdəfəlik olaraq gedib” – deyə, mənbə bildirib.

Onun həyat yoldaşı İlhamiyyə Rzayeva Lent.az-a açıqlamasında Herisçinin İrana, konkret olaraq Təbrizə getdiyini təsdiqləyib. Lakin o bildirib ki, bu səfər müvəqqəti xarakter daşıyır, Herisçinin konkret olaraq 15 günlük vizası var: “Onun mətbuatdakı çıxışlarından hər kəsə məlumdur ki, orada evi var. Yəni, Həmidin İrana getməsi elə də təəccüblü şey deyil”.

İ.Rzayeva bildirib ki, Həmid Herisçinin xaricə köçmək istəməsilə bağlı istəyi olsa da, hələlik konkret qərarı yoxdur: “Ancaq yenə də onun əvəzinə danışmaq istəməzdim. İnşallah, bir həftə, on gündən sonra gələr, özüylə danışarsız”.

“Bəs Siz nə əcəb həyat yoldaşınızla birgə getməmisiniz?” sualına isə İ.Rzayeva belə cavab verib: “İndi o gedib evi qaydaya salsın. Sonra yəqin ki, uşaqla mən də gedəcəm”.

Pərvin ABBASOV