Bakıda apteki qarət edən şəxs tanınmış aktrisa Kübra Əliyevanın oğludur

Satıcını vuraraq kassadan pul oğurlayan naməlum şəxs tapılıb

İyulun 21-də H. Cavid prospektində yerləşən aptekə daxil olaraq, orada satıcı işləyən Elmirə Məmmədovaya sifət və baş nahiyəsindən yumruqla vurub kassadan 500 manat və əl çantasından 5 manat götürərək qaçan şəxs müəyyən edilib. Bakı şəhər Baş Polis İdarəsindən Lent.az-a verilən məlumata görə, hadisəni törədən şəxs 22 iyulda tutulub.

Yasamal rayon Polis İdarəsinin 28-ci Polis Bölməsinin əməkdaşlarının keçirdiyi əməliyyat tədbirləri nəticəsində quldurluqda şübhəli bilinən əvvəllər məhkum olunmuş Rauf Məmmədov yaxalanıb.

Yasamal rayon Polis İdarəsindən APA-ya bildirilib ki, saxlanılan şəxs ilkin dindirilmə zamanı narkotik istifadəçisi olduğunu və quldurluq əməlini də məhz buna görə törətdiyini deyib. Polisdən həmçinin bildirilib ki, hadisəni törədən Rauf Məmmədov Azərbaycanın tanınmış aktrisası, əməkdar artist Kübra Əliyevanın oğludur.

Faktla əlaqədar cinayət işi başlanıb, istintaq tədbirləri davam etdirilir.