Qızını öldürən 69 yaşlı atanın məhkəməsi başladı

İyulun 8-də Ağır Cinayətlərə Dair İşlər üzrə Məhkəmədə iki uşaq anası olan qızını öldürən Şamaxı rayon sakininin cinayət işi üzrə məhkəmənin hazırlıq iclası keçirilib. Lent.az-ın məlumatına görə, hakim Ramella Allahverdiyevanın sədrliyi ilə keçirilən iclasda təqsirləndirilən 1940-cı il təvəllüdlü Qubadov Kazım Məhəmməd oğlunun cinayət işi üzrə məhkəmə baxışı iyulun 13-nə təyin olunub.

İttihama görə, 2009-cu il dekabrın 27-də Şamaxı şəhərinin Azərbaycan küçəsindəki 9 saylı ünvanda yaşayan K. Qubadov qızı 1973-cü il təvəllüdlü Həmidə Qəhrəmanovanı ov tüfəngi ilə güllələyərək, qətlə yetirib.

Daha sonra K.Qubadov polisə zəng edərək qızını öldürdüyünü bildirib. İbtidai istintaqa ifadəsində K. Qubadov qızını namus üstündə öldürdüyünü söyləyib.

Qeyd edək ki, K. Qubadov Azərbaycan Respublikası Cinayət Məcəlləsinin 120.1-ci (Qəsdən adam öldürmə) və 221-ci (Qanunsuz olaraq odlu silah, onun komplekt hissələrini, döyüş sursatı, partlayıcı maddələr və qurğular əldə etmə, başqasına vermə, satma, saxlama, daşıma və gəzdirmə) maddəsi ilə ittiham olunur.

Fərid Əkbərov