Ağdaşda kanalda meyiti tapılan qadın öldürülübmüş

Cinayəti törətmiş şəxsin müəyyənləşdirilməsi istiqamətində istintaq-əməliyyat tədbirləri davam etdirilir

İyulun 7-də saat Ağdaş rayonunun Malay dəmir yolu stansiyası ilə rayonun Qəribli kəndini birləşdirən yolun kənarından keçən su kanalından 1959-cu il təvəllüdlü, əvvəllər məhkum olunmuş, Ağdaş şəhər sakini Məmmədova Minbirgül İbiş qızının meyiti aşkar edilib. Lent.az-ın Baş Prokurorluğun rəsmi saytına istinadən verdiyi məlumata görə, qadının üzərində zorakılıq əlamətləri müəyyən edilib.

Rayon prokurorluğu və rayon polis şöbəsinin əməkdaşları tərəfindən məhkəmə-tibbi ekspertin iştirakı ilə foto çəkilişlər aparılmaqla hadisə yerinə və meyitə baxış keçirilib, meyitin daxili müayinəsi aparılıb, hadisə yerindən iş üçün əhəmiyyət kəsb edən maddi sübutlar götürülüb.

Faktla bağlı Azərbaycan Respublikası Cinayət Məcəlləsinin 120.1-ci maddəsi ilə cinayət işi başlanıb.

İş üzrə məhkəmə-tibbi ekspertizası təyin edilib, cinayəti törətmiş şəxsin və ya şəxslərin müəyyən edilərək istintaqa cəlb olunması istiqamətində rayon prokurorluğu tərəfindən intensiv istintaq-əməliyyat tədbirləri davam etdirilir.

Vüqar Baba