Bilgəhdə törədilən basqın və qətlin təfərrüatları məlum olub

Tutulan cinayətkarlar hadisəni borc üstündə törətdiklərini bildiriblər

İyunun 15-də Bilgəh qəsəbəsində yaşayan Şeydabəyovlar ailəsinə silahlı hücum edərək əri öldürüb, arvadı yaralayan şəxslər tutulub. Bakı Şəhər Baş Polis İdarəsindən Lent.az-a verilən məlumata görə, hadisəni törədən Hatəm Cəlilov və Xalid Əliyev cinayəti törətmə səbəblərini də açıqlayıblar.

Yaxalanan şəxslər istintaqa verdikləri ilkin ifadələrində bildiriblər ki, təxminən 4-5 ay əvvəl dostlar İlqarın evində hörgü işi görüblər və ev sahibinin onların hər birinə 300 manat borcu olub. Öz borclarını tələb etdikdə, İlqar onları şantajla hədələyib.

Yay ayı olduğundan İlqar gecələr evin qapısını açıq qoyub. Cinayətkarlar açıq qapıdan keçərək mətbəxin işığını söndürüblər. Xalid yataq otağına girərək İlqara bıçaq zərbələri vurub və boğazını kəsib. Səsə ayılan Bikəxanıma da bir neçə bıçaq zərbəsi vuraraq hadisə yerini tərk ediblər. Cinayətdə istifadə etdikləri bıçağı isə qəsəbədəki məktəbin həyətinə atıblar.

Faktla bağlı AR CM-nin 120.2.1-ci maddəsi ilə Sabunçu Rayon Prokurorluğunda cinayət işi açılıb və araşdırma aparılır.

15 İyunda baş vermiş hadisə nəticəsində Bilgəh qəsəbəsi Komuna küçəsində yaşayanlar İlqar Şeydabəyon ürək və boğaz nahiyələrindən aldığı bıçaq xəsarəti nəticəsində qətlə yetirilmiş, həyat yoldaşı Bikəxanım isə yaralanmışdı.

Vüqar Baba