“Mətanət A”-nın pulunu mənimsəyən şəxs azadlığa buraxıldı

Mayın 27-də Ağır Cinayətlərə Dair İşlər üzrə Məhkəmədə “Mətanət A” şirkətinin külli miqdarda pulunu mənimsəməkdə ittiham olunan şəxsin cinayət işi üzrə məhkəmə prosesi başa çatıb.

Lent.az-ın məlumatına görə, hakim İlham Mahmudovun sədrliyi ilə keçirilən prosesdə şirkətin keçmiş əməkdaşı Hafiz Səlimova hökm oxunub. Hökmə əsasən, H. Səlimov 7 il şərti cəza alaraq, məhkəmə zalından azadlığa buraxılıb.

Qeyd edək ki, şirkətə dəyən ziyan ödənilib.

İttihama görə, H. Səlimov "Mətanət A" şirkətində sement məhsullarının topdan satış məntəqələrinə paylanmasını təşkil edib. O, mağazalarda sement satışından toplanan külli miqdarda pulu mənimsəyib. Şirkətdə aparılan yoxlamalardan sonra H. Səlimov tutulub.

Təqsirləndirilən şəxs Azərbaycan Respublikası Cinayət Məcəlləsinin 179.3.2-ci (mənimsəmə və israf etmə külli miqdarda törədildikdə) maddəsi ilə ittiham olunub.

Fərid Əkbərov