Rəsmi mövqe: “245 saylı məktəbdə şagirdlərin vəziyyəti qorxudan pisləşib”

Bakı Şəhər Baş Səhiyyə İdarəsinin baş həkiminin müavini Rauf Nağıyev APA-ya bildirib ki, mantu sınağından sonra şagirdlərdə allergik reaksiya baş verməyib. Onun sözlərinə görə, şagirdlərdə qorxudan bayılma halı olub: “Allergik reaksiyanın əlamətləri başda cürdür. Bu zaman insanda qaşınma, təngnəfəslik, dəridə səpgilər, beyin-qan dövranında kəskin dəyişikliklər gedir. Şagirdlərdə belə əlamətlər olmayıb. Sadəcə iynədən qorxublar və bayılma halı müşahidə edilib”.

R. Nağıyev bildirib ki, xəstəxanaya yerləşdirilən şagirdlərin də vəziyyətləri yaxşılaşıb və onlar evə buraxılıblar.

Xatırladaq ki, bu gün Bakının Xətai rayonu ərazisində yerləşən 245 saylı məktəbdə şagirdlər arasında mantu sınağı aparılandan sonra bəzi şagirdlərdə allergik reaksiya baş verdiyi barədə məlumat yayılıb. Bakı şəhər Təcili və Təxirəsalınmaz Tibbi Yardım Stansiyasının operativ və hospital işlərinin təşkili şöbəsinin böyük həkimi Zemfira Vahidovanın APA-ya verdiyi məlumata görə, 9-10-cu sinif şagirdlərindən 7 nəfərə yerində yardım edilib, 4 nəfər isə 6 saylı Uşaq Klinik Xəstəxanasına yerləşdirilib.

Z. Vahidova bildirib ki, mantu sınağı Xətai rayonundakı 4 saylı uşaq poliklinikası tərəfindən aparılıb.