Özünü öldürmüş televiziya aparıcısı haqqında YENİ MƏLUMATLAR

Lent.az-ın məlumatına görə, Yevlax şəhəri sakini olan 1992-ci il təvəllüdlü Lətifov Lətif Şahin oğlunun bir həftə sonra, yəni oktyabrın 17-də 20 yaşı tamam olacaqmış.

Məlumata görə, bəstəboy, 1 metr 43 santimetr boyu olan L.Lətifov məhz boyuna görə hərbi xidmətə aparılmayıb. Həm də evin tək oğlu olan gənci valideynləri 18 yaşında evləndiriblər və bir neçə ay əvvəl onun övladı dünyaya gəlib. Ali təhsili olmayan Lətif qeyri-adi görünüşünə və geniş yumor bacarığına görə rayon televiziyasının diqqətini çəkib. 2 il bundan əvvəl Yevlaxda fəaliyyət göstərən “El” televiziyasında işləməyə başlayıb. Bundan sonra L.Lətifov Şəkidəki “Kanal S”-dən də təklif alıb və burada həftədə 1 dəfə yayımlanan “Lətiflə Lətifələr” verilişində aparıcı olub.

Qeyd edək ki, L.Lətifov oktyabrın 10-da Şəkidə verilişin çəkilişində olub və axşam saatlarında Yevlaxa qayıdıb. Onun meyiti Yevlaxdakı evində, hamam otağında tapılıb. İlkin müayinə nəticəsində L.Lətifovun meyiti üzərində, döş qəfəsi nahiyəsində 1 daxilə nüfuz edən, 2 daxilə nüfuz etməyən bıçaq yarası xəsarəti aşkarlanıb.

Faktla əlaqədar Cinayət Məcəlləsinin 125-ci (özünü öldürmə həddinə çatdırma) maddəsi ilə iş başlanılıb, araşdırma aparılır.

Nizam RZA