Xaçmazda qəza: 5 yaralı-FOTO

Xaçmazda bir neçə nəfərin xəsarət alması ilə nəticələnən yol-nəqliyyat hadisəsi qeydə alınıb.

APA-nın şimal bürosunun məlumatına görə, qəza Xudat-Nabran yolunun 17-ci km-də baş verib.

Nabrandan Xudat istiqamətində hərəkət edən, Quba rayon sakini, 22 yaşlı Füzuli Kərimovun idarə etdiyi “VAZ 2107” markalı nəqliyyat vasitəsi ötmə əməliyyatı zamanı qarşı tərəfdən gələn “KİA” markalı minik avtomobilinə çırpılıb.

Nəticədə F. Kərimov, onun avtomobilində olan sərnişinlər - Quba şəhər sakinləri 22 yaşlı Rəvan Cəfərov, 20 yaşlı Tural Süleymanov və digər nəqliyyat vasitəsinin sərnişinləri - Bakı sakinləri, 19 yaşlı Nəriman Məsimov və 17 yaşlı Həsən Nəbiyev müxtəlif dərəcəli xəsarətlər alıblar. Onlar Xaçmaz Mərkəzi Rayon Xəstəxanasında ilkin tibbi yardımdan sonra ambulator müalicə üçün evə buraxılıblar.

Faktla bağlı araşdırmalar davam etdirilir.