Misirdə qarşıdurmanı alovlandıracaq növbəti addım

Müsəlman Qardaşları Hərəkatının liderləri barədə həbs qərarı verildi

Misir Baş Prokurorluğu Müsəlman Qardaşları Hərəkatının lideri Məhəmməd Bədii haqqında həbs qərarı verib.

Lent.az-ın MENA agentliyinə istinadən verdiyi məlumata görə, Məhəmməd Bədii Respublika Qvardiyasının qərargahı önündə yaşanan və 55-dən artıq insanın ölümünə, yüzlərlə insanın yaralanmasına səbəb olaylar zamanı zorakılığı təşviq etməkdə günahlandırılır.

Baş Prokurorluq Məhəmməd Bediinin müavini Mahmud İzzət, Müsəlman Qardaşları Hərəkatının nüfuzlu nümayəndələrindən İssam əl-Eryan və Məhəmməd əl-Beltagi də daxil olmaqla, ümumilikdə 10 nəfər haqqında həbs qərarı çıxarıb. Müsəlman Qardaşları Hərəkatının sözçüsü Cihad əl-Haddad isə “Reuters” agentliyinə açıqlamasında hələ heç kəsin saxlanılmadığını, Baş Prokurorluğun ittihamlarının Məhəmməd Mursinin prezident postuna qaytarılmasını tələb edən müqavimət hərəkatını dayandırmaq üçün atılmış bir addım olduğunu söyləyib. Onun sözlərinə görə, bu, polis dövlətinin Adəviyə meydanındakı aksiyaları dağıtmaq cəhdidir. Cihad əl-Haddad haqqında həbs qərarı çıxarılan liderlərin bir qisminin hazırda aksiyada iştirak etdiyini də bildirib.