Kirayə ev axtaran 3 nəfəri girov götürüb işgəncə verdilər

Türkiyədə itkin düşmüş 3 pakistanlı gənc tapılıb. Lent.az "Doğan" xəbər agentliyinə istinadən xəbər verir ki, bir neçə gün əvvəl Pakistan vətəndaşı olan 25 yaşlı Məhəmməd Şahbaz İstanbul polisinə müraciət edib. O, 3 dostu ilə birgə şəhərə işləməyə gəldiklərini, dostları ilə birgə Tekirdağda iş tapdıqlarını bildirib. Lakin ev axtarmağa gedən 3 pakistanlı naməlum şəraitdə yoxa çıxıb. Bu günlərdə isə M.Şahbaz dostlarının Pakistandakı ailələrinə göndərdiyi videoları polisə təqdim edib.

Videolardan məlum olur ki, pakistanlıları girov götürən naməlum şəxslər onlara işgəncə verir və ailələrindən hər birinə görə, 50 min türk lirəsi (25 min manat) tələb edir.

Kadrları incələyən polis dərhal əməliyyata başlayıb və 24 yaşlı Ali Şah, 32 yaşlı Solat A.və 30 yaşlı Vakkar A. əl-ayaqları bağlı şəkildə aşkarlanıb. onlar dərhal xəstəxanaya yerləşdirilib.

Cinayətdə şübhəli bilinən 6 nəfər tutulub və onların ikisinin Əfqanıstan vətəndaşı olduğu üzə çıxıb.

Bəlli olub ki, cinayətkarlar ev axtaran pakistanlıları kirayə mənzil göstərmək adı ilə apararaq girov saxlayıblar.