Türkiyə ŞOKDA: baş nazirin müavini və Ankaranın bələdiyyə sədri barədə cinayət işi açıldı

Türkiyə hökumətinin sözçüsü və baş nazirin birinci müavini Bülənt Arınc və Ankara Böyükşəhir Bələdiyyəsinin sədri Məlih Gökçəklə barəsində cinayət işi başlanılıb. Lent.az-ın Türkiyə mətbuatına istinadən məlumatına görə, Ankara Baş Prokurorluğu hər iki şəxs barəsində iş qaldırıb və araşdırmalara başlayıb.

Buna səbəb isə AKP sözçüsü Bülənt Arıncın dünənki sensasional açıqlamalarıdır. Qeyd edək ki, Arınc dünən Türkiyə gündəmini zəbt edən açıqlamasında Ankara bələdiyyəsinin sədri Məlih Gökçəki korrupsiyada ittiham etmişdi. O, bələddiyə sədrinin Ankaradakı boş torpaqları Fətullah Gülən camaatına yaxın olan işadamlarına satdığını bəyanlamışdı.

Bu açıqlamaların ardınca isə Ankara Baş Prokurorluğu B.Arınç barəsində cinayəti bilib gizlətmə, M.Gökçək barədə isə M. Gökçəkin mənimsəmə və vəzifə səlahiyyətlərindən sui-istifadə maddələri ilə cinayət işi açıb və araşdırmaya başlayıb.

Cinayət işi sübuta yetirilərsə, bələdiyyə sədrinin cinayət məsuliyyətinə cəlb olunması üçün Daxili İşlər Nazirliyinə, Bülənt Arıncın isə toxunulmazlığı olduğu üçün Milli Məclisdən icazə istəniləcək.