Moskvada qatarlar relsdən çıxdı: 50 yaralı - YENİLƏNİB

Moskvada qatarların toqquşmasından sonra 50 nəfər tibbi yardımın göstərilməsi üçün həkimlərə müraciət edib.

APA-nın “RİA Novosti”yə istinadən verdiyi xəbərə görə, bu barədə “Rusiya Dəmir Yolları”ndan bildirilib.

“Elektrik qatarının iki vaqonunun və sərnişin qatarının lokomotivinin seksiyasının relsdən çıxması nəticəsində dəmir yolunda hərəkət dayandırılıb. İlkin məlumata görə, tibbi yardımın göstərilməsi üçün 50 nəfər həkimlərə müraciət edib”, - deyə məlumatda bildirilir.

Bundan əvvəl 20 nəfərin xəsarət alması, 12 nəfərin xəstəxanaya yerləşdirilməsi barədə məlumat yayılmışdı.

**** 02.32

Moskvanın qərbində qatarların toqquşması nəticəsində 12 nəfər xəsarət alıb, onlardan birinin vəziyyəti ağırdır. APA-nın xəbərinə görə, bu barədə “RİA Novosti”yə Moskvanın Səhiyyə Departamentindən bildirilib.

“12 nəfər xəstəxanaya yerləşdirilib, onların arasında bir uşaq da var. Xəsarət alanlardan birinin vəziyyətinin ağırdır”, - deyə Departamentdən bildirilib.

Rusiya FHN-nin məlumatına görə, qatarların toqquşması nəticəsində dörd vaqon relsdən çıxıb.