Gənc oğlanın polislə bu əməkdaşlığı hamını qəzəbləndirdi

18 yaşlı Niklas Mattey minlərlə parkinq pozuntusunu polisə xəbər verəndən sonra Almaniyada "Snitç Master" kimi şöhrət qazanıb.

Lent.az xarici mediaya istinadla bildirir ki, gənc Qrafenhainiçen sakini bu ilin əvvəlində qeyri-adi hobbisi ilə şəhərdə velosiped sürmək, qanunsuz park edilmiş avtomobillərin fotoşəkillərini çəkmək və şəkilləri yerli polisə göndərməklə milli medianın diqqətini çəkib. O, özünü "Töhmətlərin Ustası" adlandırır və sadəcə olaraq vətəndaşlıq borcunu yerinə yetirdiyini iddia edir.

Cəmi 18 yaşı olan bu gənc Almaniyada parkinq qaydalarına çox bələddir və şəhərdə gəzintiləri zamanı qanunsuz park edilmiş avtomobilləri asanlıqla tanıyır. O, smartfondan istifadə edərək qaydanı pozanların avtomobillərinin şəkillərini çəkir və cərimələrin tətbiq edilməsi üçün həmin şəkilləri yerli hüquq-mühafizə orqanlarına göndərir.

Mattey keçən il polisə 4000-dən çox şikayət verib və nəticədə 140 995 avro cərimə yığılıb. Cərimələnənlərin əksəriyyəti Saksoniya-Anhaltda sakinləridir. Lakin onun fəaliyyəti mediada geniş işıqlandırılmağa başlayandan sonra o, “ovlarını” genişləndirmək qərarına gəlib və bütün Almaniyada qayda pozanları müəyyənləşdirməyə başlayıb.

Niklas sürücülər arasında rəğbət qazanmayıb və onun fəaliyyəti bəzən münaqişələrə, o cümlədən zorakılıq hadisələrinə səbəb olub. Lakin bu, gəncin vətəndaşlıq borcunu yerinə yetirməsinə mane olmayıb. O deyir ki, məqsədi parklanma qaydalarına əməl etmək və onlara məhəl qoymayanları cəzalandırmaqdır.