Burada pələnglər gündə bir adamı yeyirlər - Xəbərdarlıq OLUNDU

Hindistanın bir bölgəsində pələnglər 8 günə 8 nəfəri parçalayıblar.

Lent.az xarici mediaya istinadla bildirir ki, hadisələr Maharaştra ştatının Çandrapur rayonunda baş verib. Qurbanlar arasında Bhandkrna kəndindən olan 70 yaşlı Rişi Pendor kimi yaşlı insanlar da var.

Məlumata görə, kişi ruhi xəstəlikdən əziyyət çəkib. Hadisə baş verən gün o, naməlum səbəbdən meşəyə girib və orada pələngin hücumuna məruz qalıb. Kişini xilas etmək mümkün olmayıb.

Digər insident Vadhona kəndində 63 yaşlı Maroti Şendenin qara xurma yarpaqlarını toplamağa getməsi zamanı baş verib. Həkimlər onu xəstəxanaya çatdırsalar da, xilas edə bilməyiblər.

Hər iki halda ailələrə 50.000 rupi (təxminən 1000 manat) məbləğində kompensasiya ödənilib.

Səkkiz qurbandan altısı qadındır. Ötən il həmin rayonda cəmi 29 hadisə qeydə alınıb.

Yerli məmurlar, pələnglərin hücumlar etdiyi meşələrin yaxınlığında yarpaq yığmağın təhlükəsi barədə xəbərdarlıq edib. Yerli sakinlərə qrup halında işləmək və axşam saat 5-ə qədər evə getmək barədə çağırış edilib.