“Kurtlar Vadisi Fələstin” məhkəməyə verilib - YENİLƏNİB

Lent.az-ın “ensonhaber.com”a istinadən verdiyi xəbərə görə, filmdə dekorasiya və rəssamlıq işlərini görmüş Səlahədin Orhan almalı olduğu 40 min lirənin ödənilməməsi səbəbindən bu addımı atıb.

Məhkəməyə şikayət məktubunda Səlahəddin Orha bildirib ki, 15 işçi ilə gecə-gündüz çəkiliş meydançalarında işləyib. Amma əməklərinin müqabilində ödənilməli olan 70 min lirənin yalnız 30 minini ala biliblər. O, həmçinin qeyd edib ki, filmi çəkən şirkətə dəfələrlə müraciət etsələr də, qarşı tərəf pulu verməkdən imtina edib.

Qeyd edək ki, şikayətçilər əmək haqlarının ödənilməyəcəyi təqdirdə filmin təqdimat günü şirkətə “surpriz” hazırlayacaqlarını da qeyd ediblər.

“Kurtlar Vadisi Fələstin” filminin istehsalçısı olan “Panafilm” şirkəti isə çəkilişdə əməyi olan hər kəsin pulunun ödənildiyini bildirib. Şirkətdən verilən məlumatda deyilir ki, bəzi qüvvələr onların işinə kölgə salmaq istəyir və buna qarşı hüquqi tədbirlər görəcəklər.