Ekvador prezidenti azad edildi

Lent.az-ın CNN-ə istinadən verdiyi məlumata görə, müəyyən güzəştləri ləğv edilən və mükafatları azaldılan polislərin qiyamı silahlı toqquşmaya yol açıb. Prezidentin xəstəxanadan çıxarılması üçün keçirilən əməliyyat zamanı 2 polis öldürülüb, 50 nəfər yaralanıb.
Xüsusi təyinatlılar xəstəxanaya daxil olaraq dövlət başçısını azad ediblər.

Qeyd edək ki, prezident dünən qiyam qaldıran polislərə görüşə gəlib. Ancaq onu bomba və gözyaşardıcı qazla qarşılayıblar. Mühafizəçilər prezidenti xəstəxanaya aparmağı bacarsalar da, binadan çıxara bilməyiblər. Bu zaman Rafael Korrera parlamentə müraciət edib.

Prezident xəstəxana binasından əleyhqazda və tərəfdarlarının əhatəsində çıxıb. Rafael Korrera deyib ki, öldürülmüş polisləri görəndə qorxudan yox, kədərindən ağlayıb.

Ölkədə isə qarışıqlıq başlayıb. Naməlum şəxslər iki bankı qarət edib, 1 dinc sakini öldürüblər. Prezident bildirib ki, polislər arasında naməlum təxribatçı olub və o, böyük ehtimalla, xarici ölkə vətəndaşıdır.