Ermənilər Qarsda məscidi kilsəyə çevirməyə çalışacaqlar

Ermənilər Türkiyədə, azərbaycanlıların sıx yaşadıqları Qars şəhərində məscidi kilsəyə çevirmək üçün hərəkətə keçiblər. Lent.az-ın “Novosti Armeniya”ya istinadən verdiyi məlumata görə, artıq Qarsda ermənilərin Arakelots kilsəsi adlandırdıqları məsciddə dini mərasim keçirmək üçün Türkiyə Nazirlər Kabinetindən icazə alınmasına müvafiq müraciət olunub və proses başlayıb.

Türkiyə Turizm Nazirliyinin Qarsdakı səlahiyyətli nümayəndələrindən biri “Novosti Armeniya”ya açıqlamasında deyib ki, Qarsda turizmin inkişafı üçün yerli əhali məscidin ildə bir dəfə kilsə kimi ibadətə açılmasını istəyir.

O, Van gölündəki Akdamar adasında yerləşən kilsənin az əvvəl ildə bir dəfə ibadətə açılması nəticəsində çoxlu sayda erməni turistin bölgəyə axışmasından sonra bu məsələnin gündəmə gəldiyini bildirib.

Qeyd edək ki, məscid tarixi Qars qalasının ətrafında yerləşir. Ermənilər Qarsı da “Böyük Ermənistan”ın tərkib hissəsi sayırlar.