Tacikistanda qanlı döyüşlər gedir

Tacikistan ordusunun Rəşt rayonunda keçirdiyi əməliyyat zamanı 5 silahlı öldürülüb. Lent.az-ın “ferqana.ru” saytına istinadən verdiyi məlumata görə, öldürülən silahlılar Birləşmiş Tacikistan Müxalifətinin keçmiş səhra komandiri Mirzəxuc Əhmədovun qruplaşmasına daxildirlər.

Mirzəxuc Əhmədovun öldürülüb-öldürülmədiyi məlum deyil. “ferqana.ru” saytı Qarma sakinlərinə istinadən yazıb ki, Mirzəxuc Əhmədovun evinə raket zərbəsi endirilib. Tacikistan Dövlət Təhlükəsizlik Komitəsinin məlumatında bildirilir ki, qanunsuz silahlı qrupun rəhbərinin evindən 6 avtomat, 3 qumbaraatan, patron və partlayıcılar aşkarlanıb.

“İnterfaks” agentliyi isə Tacikistan Dövlət Televiziyasına istinadən məlumat yayıb ki, Mirzəxuc Əhmədovun dəstəsinin 5 üzvü saxlanılıb və onların paytaxt Düşənbəyə göndərilməsi planlaşdırılır.

Ordunun apardığı əməliyyatda əsas məqsəd Molla Abdulla Rəhimovu ələ keçirmək, yaxud məhv etməkdir.

Qeyd edək ki, sentyabrın 19-da Tacikistanın cənubunda Qram qəsəbəsində molla Abdulla Rəhimovun dəstəsi hərbi kolonu pulemyot və qumbaraatanlardan atəşə tutub. Rəsmi məlumatlara görə, nəticədə 25 hərbçi həyatını itirib, 14 hərbçi yaralanıb. Qeyri-rəsmi məlumatlarda 40 hərbçi həyatını itirdiyi bildirilir. Molla Abdulla Rəhimov 1997-ci ildə başa çatan vətəndaş müharibəsindən sonra silahı yerə qoymaqdan imtina edən səhra komandirlərindən biridir. Molla Abdulla Rəhimov Əfqanıstanda “Taliban” silahlıları ilə birgə də döyüşüb, NATO hərbçilərini əsir götürsə də, sonra azadlığa buraxıb.