Terrorçular interneti ələ keçiriblər

Beynəlxalq Polis Təşkilatı (“İnterpol”) radikal qrup və təşkilatların tərəfdarlarına aid saytların sayında güclü artımın qeydə alındığını açıqlayıb.

Lent.az-ın CNN-ə istinadən verdiyi məlumata görə, “İnterpol” rəhbərliyində yer alan Ronald Noble deyib ki, terror təşkilatları üçün tərəfdar və döyüşçü toplayan, terrorçu qruplar arasında əlaqələr quran saytların sayının sürətlə artması dünya üçün yeni və çox təhlükəli bir haldır.

Ronald Noble nəzərə çatdırıb ki, 1998-ci ildə belə saytların sayı 12 olsa da, 2006-cı ildə 4500-ə, hazırda isə 10 minə çatıb: “Təhdid qloballaşdı, virtual aləmə yerləşdi və qapımıza çatdı. İnternet üzündən indi cəmiyyətlərdə radikalizm meylləri azaltmaq əvvəlkinə nisbətən daha çətindir. Radikal siyasi baxış və terror aktlarını müdafiə edən bu saytların hədəfi əsasən gənc və orta sinifdən olan insanlardır. Xüsusən terror təşkilatı liderlərinin çıxışları yer alan video və mesajlar çox qısa müddət ərzində sayı minlərlə olan bu saytlarda yayılır”.