Tacikistanda ordu əməliyyata başladı

Tacikistan ordusu ölkənin şərqində əməliyyata başlayıb.

Lent.az-ın “İnterfaks” agentliyinə istinadən verdiyi məlumata görə, geniş miqyaslı əməliyyat bu gün günün ikinci yarısında başlayıb.

Məqsəd molla Abdulla Rəhimovun dəstəsini zərərsizləşdirməkdir. Əməliyyat paytaxt Düşənbədən 180 kilometr şərqdə, Rəşt rayonunda aparılır. Hüquq-mühafizə orqanlarındakı mənbə “İnterfaks”a bildirib ki, sentyabrın 19-da hökumət qüvvələrinə atəş açan qanunsuz birləşmələrin, yəni molla Abdulla Rəhimovun dəstəsinin yeri aşkarlanıb. Məqsəd bu dəstəni zərərsizləşdirməkdir.
Qeyd edək ki, sentyabrın 19-da Tacikistanın cənubunda Qram qəsəbəsində molla Abdulla Rəhimovun dəstəsi hərbi kolonu pulemyot və qumbaraatanlardan atəşə tutub .40 hərbçi həyatını itirib. Molla Abdulla Rəhimovu 1997-ci ildə başa çatan vətəndaş müharibəsindən sonra silahı yerə qoymaqdan imtina edən səhra komandirlərindən biridir. Molla Abdulla Rəhimov Əfqanıstanda “Taliban” silahlıları ilə birgə də döyüşüb, NATO hərbçilərini əsir götürsə də, sonra azadlığa buraxıb.