Qərbi Nil virusu amerikanları qırır

Lent.az-ın İTAR-TASS agentliyinə istinadən verdiyi məlumata görə, bu gün ABŞ Xəstəliklərə Nəzarət və Profilaktika Mərkəzi indiyə qədər ölkədə virus yoluxması nəticəsində 118 nəfərin öldüyünü açıqlayıb.

Bu, ABŞ tarixində ən ciddi Qərbi Nil qızdırmasına yoluxma halıdır. Son həftələr ərzində virus Alyaska və Havay istisna olmaqla, ABŞ-ın bütün ştatlarında yayılıb. Ümumilikdə, ABŞ-da 2 min 636 yoluxma halı qeydə alınıb. Son həftə ərzində virusa yoluxanların sayı 30 faiz artıb.

Qeyd edək ki, Qərbi Nil virusu 1937-ci ildə Uqandada aşkarlanıb. Bu virusa qarşı vaksin kəşf olunmayıb. Xəstəliyin əlamətləri baş ağrısı, yorğunluq, ürək bulanması, əsəb, səpgi, limfa düyünlərinin şişməsidir. Virusun əsas daşıyıcıları ağcaqanadlardır. Xəstəlik xüsusən 50 yaşdan yuxarı insanların həyatı üçün daha təhlükəlidir.

Xatırladaq ki, ABŞ-da Qərbi Nil virusuna ilk dəfə 1999-cu ildə rast gəlinib. Həmin vaxt Nyu-York bələdiyyəsi bu şəhərdə ağcaqanadları məhv etmək üçün vertolyotlarla kimyəvi maddələr səpmək, parklarda xüsusi tədbirlər görmək məcburiyyətində qalıb.