8955
11:05
27 Sentyabr 2019

PENSİYALAR YENİDƏN ARTIRILIR: büdcədə nəzərdə tutulub

"2020-ci il yanvarın 1-dən etibarən pensiyalar 10 % həcmində indeksasiya ediləcək".
Bu sözləri Lent.az -a açıqlamasında iqtisadçı-ekspert Rəşad Həsənov deyib. O bildirib ki, dövlət büdcəsi haqqında məlumatlar hələ tam olaraq ictimailəşdirilməyib:
“Sadəcə Maliyyə Nazirliyi tərəfindən makro göstəricilər açıqlanıb. Bu göstəricilər isə büdcənin xərclərinin struktur təhlilini aparmağa imkan vermir.
Onu qeyd etmək olar ki, faktiki olaraq 2020-ci il üçün dövlət büdcəsində sosial xərclərin payı artacaq. Belə ki, təxminən büdcənin 40 %-i sosial xərclərə ayrılacaq, bu il isə bu rəqəm 31-32 % ətrafında dəyişirdi.
Həmçinin deyim ki, artımların böyük bir qisminin əsas səbəbi 2019-cu ildə açıqlanan sosial paketlər əsasında qoyulub”.
R.Həsənov qeyd edib ki, pensiyaların maliyyələşməsi dövlət büdcəsindən yox, Dövlət Sosial Müdafiə Fondunun büdcəsi ilə həyata keçirilir:
“Faktiki olaraq hazırda əmək bazarının böyük əksəriyyəti illeqaldır. Bunun nəticəsində isə toplanılan sığorta haqları pensiya ödənişlərini kompensasiya edə bilmir və bu kəsri hökumət dövlət büdcəsindən transfer edir. Ola bilsin ki, bu istiqamətdə də ayrılan xərclərin həcmində dəyişiklik baş versin”.
İqtisadçı-ekspert vurğulayıb ki, 2020-ci ildə pensiyaların artımı baş tutacaq:
“Bu, qanunvericiliyin tələbədir. Belə ki, yanvar ayının 1-dən etibarən orta aylıq əməkhaqqının artım tempinə uyğun olaraq müvafiq həcmdə pensiyalar artacaq.
Qeyd edim ki, hazırda orta aylıq əməkhaqqının artım tempi 8 ayın nəticəsinə görə 8.4 faizdir və ola bilsin ki, növbəti aylarda bu göstərici yüksəlsin, çünki sentyabr ayının 1-dən etibarən minimum əməkhaqqı artırılaraq 250 AZN olub. Bu da dövlət sektorunda ümumi əməkhaqqı büdcəsinə, son nəticədə isə əməkhaqqının artım tempinə təsir göstərəcək. İndiki halda proqnozlaşdırmaq mümkündür ki, il ərzində əməkhaqqının artım tempi 10 %-dən çox olsun. Bu baş tutarsa, ilin əvvəlində yəni, yanvarın 1-dən etibarən pensiyalar 10 % həcmində indeksasiya ediləcəkdir.
Nəzərə alsaq ki, cari ilin əvvəlində minimum pensiya 116 manat idi və yaşlılar üçün müəyyən edilən ehtiyac meyarının həcmi isə 144 manatdır, minimum pensiya müəyyən edilən istehlak meyarından belə az idi. Ancaq iki dəfə bununla bağlı qərar qəbul edildikdən sonra bu rəqəm 200 manata çatdı”.
R.Həsənov son olaraq deyib ki, proqnoz vermək üçün hələ tezdir:
“Məlumatlar yaxın vaxt çərçivəsində ictimailəşəcək və daha detallı araşdırmadan sonra proqnoz vermək mümkün olacaq. Amma bir məsələ aydındır ki, gələn il pensiyalar artacaq. Bir daha bildirim ki, bu, proqnoz yox, qanunvericiliyin tələbidir”.
Qeyd edək ki,Milli Məclisin Əmək və sosial siyasət komitəsinin sədri Hadi Rəcəbli bir neçə gün əvvəl yerli mediaya açıqlamasında bildirib ki,Azərbaycanda gələn il əməkhaqqı və pensiyaların yenidən artırılması gözlənilir:
"2020-ci ilin dövlət büdcəsində bu illə müqayisədə sosial məqsədlərə təxminən 5 milyard manatdan çox vəsait ayrılması nəzərdə tutulub.Bu vəsait əməkhaqqının artırılması və digər məsələlərə yönəldiləcək.
Onu da vurğulamaq istəyirəm ki, gələn ildən pensiyalar və əmək haqlarında artımın olması ehtimalı var. Belə ki, büdcədə sosial məqsədlər üçün ayrılan vəsaitlərin artırılması bundan xəbər verir”.