FHN-in İdman Sağlamlıq Mərkəzində çempion yanğınsöndürənlərlə görüş keçirilib

Aavqustun 28-də Fövqəladə Hallar Nazirliyinin İdman Sağlamlıq Mərkəzində FHN-in Dövlət Yanğından Mühafizə Xidmətinin beynəlxalq yarışlarda uğur qazanan əməkdaşları ilə görüş keçirilib.

Lent.az məlumat verir ki, Fövqəladə Hallar Nazirliyinin İdman Sağlamlıq Mərkəzinin rəisi polkovnik Füzuli Musayev həmin idmançıları - Dövlət Yanğından Mühafizə Xidmətinin Nizami rayon N saylı bölməsinin yanğınsöndürəni kiçik çavuş Əşrəf Bayramovu və DYMX Binəqədi rayon hissəsinin yanğınsöndürəni çavuş Toğrul Mikayılovu əldə etdikləri nailiyyətlər münasibətilə təbrik edib, onlara gələcək yarışlarda müvəffəqiyyətlər arzulayıb.

Qeyd edək ki, Əşrəf Bayramov oktyabrın 26-da İtalyanın Karrara şəhərində keçirilmiş MMA döyüş növləri üzrə Dünya çempionatında gümüş medal qazanıb. Bundan əlavə, idmançımız 2019-cu il iyulun 20-də Gürcüstanın Batumi şəhərində keçirilmiş MMA üzrə professional döyüşdə 56 kq çəki dərəcəsində çıxış edib və erməni idmançıya qalib gələrək çempion olub. Aprel döyüşlərinin iştirakçısı olmuş, DYMX Binəqədi rayon hissəsinin yanğınsöndürəni çavuş Toğrul Mikayılov isə avqustun 23-25-də Rumıniyada keçirilən Kung-fu Sanda üzrə Dünya Çempionatında 60 kq çəki dərəcəsində mübarizə apararaq qızıl medalın sahibi olub.