"Neftçi" Avropa Liqasında "Bney Yehuda"nı qəbul edəcək

Bu gün Avropa Liqasında III təsnifat mərhələsinin ilk oyunlarına yekun vurulacaq.

APA-nın məlumatına görə, qitənin ikinci dərəcəli klub turnirində mübarizəni davam etdirən yeganə Azərbaycan təmsilçisi “Neftçi” də növbəti sınağına çıxacaq.

Ölkəmizin ən titullu klubu İsrailin “Bney Yehuda” klubu ilə qarşılaşacaq. Bakı təmsilçisi ilk görüşü evdə keçirəcək.

Əvvəlki iki mərhələdə Moldovanın “Speranta” (3:0, 6:0) və Rusiyanın “Arsenal” (1:0, 3:0) klublarını quru hesablı məğlubiyyətlərə uğradan Roberto Bordinin yetirmələri Azərbaycan futbol tarixinə mütləq rekordçu kimi düşməyə çalışacaq. Həm ardıcıl qələbə, həm də quru oyunlar sayında ölkə rekordunu təkrarlayan “ağ-qaralar” 5-ə çatacağı göstəricidə mütləq nailiyyət əldə edəcək.

“Bakcell Arena”da keçirdiyi mövsümün hər iki qarşılaşmasında rəqibini darmadağın edən “Neftçi” növbəti böyükhesablı qələbəyə köklənib. Paytaxt futbolçuları özlərinə məxsus olan bu göstəricidəki rekordu da yeniləmək əzmindədir.

7 ildən sonra yenidən qrup mərhələsində oynamağa əlverişli imkan qazanan bakılılar İsrailə rahat yollanmaq üçün sərfəli nəticə əldə etməyə borcludur. R.Bordinin komandasını pley-offda “Malmo” (İsveç) – “Zrinski” (Bosniya və Herseqovina) cütünün qalibi gözlədiyindən “Bney Yehuda” səddini aşmaq qrup perspektivini artıracaq.

Qeyd edək ki, “Bakcell Arena”da baş tutacaq “Neftçi” – “Bney Yehuda” matçı saat 21:00-da başlayacaq.

Avropa Liqası

III təsnifat mərhələsi

İlk oyun

8 avqust

21:00. "Neftçi" – "Bney Yehuda" (İsrail)

Baş hakim: Kərim Abed

Baş hakimin köməkçiləri: Hiçam Zakrani, Mikael Berçebru

Dördüncü hakim: Floran Batta (hamısı Fransa)

UEFA nümayəndəsi: İonel Piskanu (Rumıniya)

Hakim-inspektor: Kyell Alset (Norveç)

Bakı. "Bakcell Arena” stadionu