Toyota və BMW müqavilə imzaladı - Bu avtomobili birgə istehsal edəcəklər

Toyota və BMW hidrogen yanacaqla işləyən avtomobil istehsalında tərəfdaşlıqlarını inkişaf etdirəcək bir müqaviləyə imza atıb.

Lent.az xəbər verir ki, hidrogen yanacağı ilə işləyən avtomobillər, elektrik avtomobilləri kimi, öz gücünü elektrik enerjisindən alır. Buna baxmayaraq hidrogen avtomobillərində heç bir akkumulyator yoxdur və bu avtomobillər elektrik enerjisini hidrogendən əldə edirlər.

Benzin və dizel kimi yanacaqların əvəzinə hidrogendən istifadə karbon qazının miqdarını azaltmaq üçün ən yaxşı həllərdən biridir. Bu səbəbdən bəzi istehsalçılar bu texnologiyanı daha da inkişaf etdirmək üçün çalışırlar.

İki avtomobil nəhəngi elektrik avtomobillərinə rəğbətin azaldığı vaxtda bu avtomobilləri yeni nəsil ekoloji cəhətdən təmiz modellər kimi görürlər.

BMW bir neçə il ərzində hidrogenlə işləyən avtomobil modelinin kütləvi istehsalına başlamağı planlaşdırır.

Yaponiya və Almaniya şirkətləri gələn həftə tərəfdaşlıq haqqında anlaşma memorandumu imzalayacaq və bunu sentyabrın 5-də BMW-nin mətbuat konfransında elan edəcəklər.

Lakin yenilənmiş tərəfdaşlıq çərçivəsində Toyota BMW-ni hidrogen çənləri və yanacaq elementləri sistemləri də daxil olmaqla daha çox əsas komponentlərlə təmin edəcək.

BMW avtomobilin qalan hissəsini istehsal etmək üçün sürücü sistemləri kimi öz texnologiyasından istifadə edəcək.