Yaponiya tarixində iz qoyan yeganə qaradərili samuray - TARİX
21 may 2024 22:00 (UTC +04:00)

Yaponiya tarixində iz qoyan yeganə qaradərili samuray - TARİX

Daha çox filmlərdən gördüyümüz və sırf Yaponiya tarixinə aid samuraylar arasında qeyri-millətlərin nümayəndələri də olub. Onlar arasında hətta qaradərili samuray belə olub.

Lent.az Yaponiya tarixində Yasuke adı ilə tanınan həmin samuray barədə məlumatı təqdim edir.

Hazırda qaradərili döyüşçünün nə anadan olduğu ölkə, nə də doğulduğu il etibarlı şəkildə məlum deyil. Bununla belə, əksər tarixçilər və tədqiqatçılar onun Mozambikdən olmasını düşünür. Çünki məhz Mozambikdən qul əməyinin təşəbbüskarı olan portuqaliyalı tacirlər əsas işçi qüvvəsini alırdı. Afrika qitəsindən gələn ilk mühacirlərin Yaponiyaya 1546-cı ildə Portuqaliya donanmasının kapitanı Xorxe Alvaresin ekspedisiyası ilə birlikdə gəldiyi etibarlı şəkildə məlumdur.

Tarixi tədqiqatlara əsasən, Yasuke 1579-cu ildə Yaponiyaya ayaq basır. O, yerli ərazilərə xristian missioneri kimi vacib bir missiya üçün gələn portuqaliyalı Alessandro Valinyanonun xidmətçisi kimi gəlib. 1581-ci ilin martında Valiyano Yaponiya paytaxtı Kiotoya çatır və yerli hökmdar - Oda Nobunaqa ilə görüşür.

Qarşısında qaradərili Yasukeni görən yapon hökmdar missioner Valiyano ilə deyil, məhz onun qulu ilə maraqlanırdı. Hündür qaradərili nəhəng (təxminən 2 metr boyunda) təkcə adi insanlar arasında deyil, həm də təcrübəli zadəganlar arasında əsl maraq doğurur. Oda Nobunaqa özünəməxsus şövqlə Yasukenin dərisinin qara olmasına inanmayıb, əvvəlcə onun soyunmasını, sonra isə dərisinin qaşımasını tələb edir.

5 dəqiqəlik məcburi sanitar-estetik prosedurlardan sonra dərinin rənginin həqiqətən qara və təbii olduğu yaponlara aydın olur. Şok və sürpriz dalğasını dəf edən Nobunaqanın qardaşı oğlu dərhal Yasukeyə qızıl pullar verir və hökmdar özü Valiyanoya Yasukeni Kiotoda öz xidmətində saxlamağa dəvət edir. Yasuke Oda Nobunaqanın xidmətinə qəbul edilir. Və karyerası sürətlə irəliləyir.

Bir il ərzində Yasuke əvvəlcə Nobunaqanın şəxsi mühafizəçisi, sonra isə Nobunaqa tərəfindən verilən mərasim bıçağı ilə birlikdə samuray statusu alır. Daha sonra samuray Yasuke şəxsi iqamətgaha da sahib olur.

Hökmdar üçün böyük maraq obyekti olan Yasuke tez-tez yorğun Nobunaqanın asudə vaxtını şənləndirir və nadir hallarda, o zaman tamamilə qeyri-mümkün təsəvvür edilən hökmdarla birlikdə şam yeməyinə də qalırdı. Afrika mənşəli samuray yapon dilini öyrənərək, Nobunaqanın hərbi xidmətində dururdu və onunla Afrika və Yaponiyadakı vəziyyət haqqında çox müzakirə aparırdı.

Lakin Yasukenin Yaponiyadakı xoş günləri çox çəkmir. Hərbi rəqibi Akeçi Mitsuhide ilə mübarizədə məğlub olan Oda Nobunaqa 1582-ci ildə məcburi intihar (harakiri) edir.

Hökmdarının ölümündən sonra samuray Yasuke onun varisi Oda Nobutadanı dəstəkləyir. O, Nijo qalasında Yasuke Nobutada qüvvələri ilə birlikdə döyüşür, lakin sonda Akeçi Mitsuhidenin qüvvələri tərəfindən əsir götürülür. Yasukenin sonrakı taleyi haqqında heç nə məlum deyil, lakin onu tutanlar Yasukeni heyvan hesab edirdilər və məhbusun dərisinin qeyri-adi rəngindən açıqca iyrəndilər. Buna görə də Yaponiyanın ilk və son Afrika mənşəli samurayının edam olunması ən çox ehtimal olunan seçimdir.

1 2 3 4 5 İDMAN XƏBƏRLƏRİ
# 4500
avatar

Vüqar İsmayılov

Oxşar yazılar