Virusdan qoruyan iki faktordan biri - Tanınmış dietoloqdan AÇIQLAMA

"Yalnız yeni növ koronavirusdan deyil, bütün növ infeksiya və viruslardan qorunmaq üçün qidalanmanın müdafiəedici funksiyasını işə salmaq lazımdır".

Bunu Lent.az-a tanınmış həkim-dietoloq, pəhriz kitablarının müəllifi Leyla Zülfüqarlı deyib.O, orqanizmin qoruyucu funksiyasını işə salmaq üçün düzgün qidalanmanın vacibliyindən danışıb:

"Orqanizmin bu funksiyasını işə salmaq üçün xüsusi qidalardan istifadə mütləqdir. Məlumdur ki, insanlar koronavirusa görə narahatlıq keçirir və profilaktik məqsədlər üçün müxtəlif vitaminlər, mikroelementlər qəbul edirlər. Bütün bu vitamin və mineralların qaynağı bizim qidalarımızdır. Ona görə də vaxtında bu cür qidalarla qidalanan insanların immun sistemi güclü olur. Demək ki, onlar daha az risk qrupunda olurlar".

Dietoloqun sözlərinə görə, artıq iki faktorun bizi virusdan qoruya bildiyi sübut olunur: "Biri fiziki təmasdan çəkinmək, məsafə saxlamaq, ikincisi immun sistemini gücləndirməkdir. Yediyimiz qidaların tərkibinə diqqət etməliyik. Vacib qoruyucu faktor olan D vitaminini yetəri qədər almalıyıq. Bu vitamini daha çox Günəşdən alırıq. Süd məhsullarından bol-bol istifadə etmək lazımdır. Kərə yağı yeyilməlidir. Vitamin D qaynağıdır. Vitamin C tərkibli portağal, narıngi, limon, kivi, nar kimi meyvələrdən çox yeyilməlidir. Meyvə və tərəvəzlərə rəng verən onların tərkibindəki antioksidanlardır ki, bunlar da bizi müdafiə edən faktorlardır. Tərkibində sink olan qidalar yeyilməlidir. Onu da deyim ki, sink yalnız dəniz məhsullarında deyil, quzu ətində də var. Ümumiyyətlə, bütün ətlərdə var. Sadəcə, ətin suyu deyil, özü yeyilməlidir. Sink çərəzlərdə də var. Qoz, badam yemək, boranı tumundan istifadə etmək olar. Bu dönəmdə təmiz şokoladlar da bizim üçün faydalı qidalarandandır. Şokoladın tərkibindəki kakao yüksək miqdarda sink ehtiva edir. Yəni, şəkər tərkibi aşağı, kakao tərkibi yüksək olan qidalardan yemək olar. Kakao ilə südü dəmləyib içə bilərik ki, südün tərkibindəki D vitaminin, kakaonun içindəki sinkin faydasını görə bilək".

Hansı qidalardan qaçmaq lazımdır?

Müsahibimiz uzaq durmalı olduğumuz qidaların da adını açıqlayıb. Karbohidratlardan-xəmir yeməklərindən, çörək, şəkərdən, makarondan uzaq durmaqda fayda var: "İşlənmiş qidalar olan kolbasa, sosiska, ketçubdan qaçsınlar. Çünki işlənmiş qidalar immun sistemini zəiflədir. Gündə bir dəfə tərkibində tərəvəz olan zeytun yağında hazırlanmış sarımsaqlı detoks şorbalardan, iki gündən bir mütləq ət məhsullarından istifadə olunsun. Quş ətindən az istifadə etmək lazımdır. Quş əti yeyiləcəksə, hinduşka ətinə üstünlük verilməlidir. Əsasən quzu əti, balıq, mal əti, daha çox da can ətindən yemək lazımdır".

Dietoloq bir sıra şəfaverici ədviyyatları da yaddan çıxarmamağı tövsiyə edir. Onun sözlərinə görə, qaraçörəkotu, kətan toxumu, pul bibər və s. öskürək azaldıcı, bəlğəmgətirci təsirlərə malikdir: "Bütün bu dediklərimi istifadə etməklə profilaktik tədbirlər görmüş oluruq ki, bu zaman da iynə-dərmana elə də ehtiyac qalmır. Yəni qidalar bizim dərmanımız olacaq".