Dekabrın 21-də Yer kürəsini nə gözləyir? - AÇIQLAMA

"Günəşdə baş verən partlayışlar hər zaman baş verib və verəcək. Bu hadisədə təşvişə düşəcək heç bir səbəb yoxdur".

Bunu Lent.az-a açıqlamasında Nəsrəddin Tusi adına Şamaxı Astrofizika Rəsədxanasının direktoru, günəş fizikası üzrə mütəxəssis, AMEA-nın müxbir üzvü Namiq Cəlilov deyib.

O, dekabrın 21-də Yer kürəsinin qaranlığa qərq olacağı, baş verən proseslərdən elektrik enerjisinin kəsiləcəyi və digər bu kimi xəbərlərin feyk xəbərlər olduğunu, insanlarda təşviş yaratdığını açıqlayıb.

N.Cəlilov bütün planetin altı gün boyunca qaranlığa qərq ola biləcəyi, son 300 ilin ən güclü maqnit fırtınasının olacağı ilə bağlı yayılan xəbərlərə aydınlıq gətirib: "Narahatlığa əsas yoxdur. Günəşdə hər zaman partlayışlar olur. Yeri qoruyan maqnit sahəsi baş verən belə partlayışlar nəticəsində əmələ gələn kütlələrin təsirindən daha güclüdür".

Direktor bildirib ki, Günəşin maqnit aktivliyinin növbəti minimum dövrü təxminən bir il əvvəl bitməli olsa da, hansısa səbəbdən uzandı: “Günəş aktivliyinin minimum dövründə Yerə Günəşdən gələn plazma atılmalarının və bununla bağlı təzyiqlərinin ehtimalı və gücü azalır. Çünki Günəşin səthində maqnit aktivliyi olanda alışmaların, partlayışların və plazma atılmalarının sayı və gücü çox olur. Yer mütəmadi olaraq güclü cod şüalanmaya məruz qalır. Bizi bu həmlələrdən qoruyan Yerin maqnit sahəsi və onun atmosferidir. Minimum dövrün tədricən maksimuma keçməsi üçün Günəşin daxilində bir sıra fiziki proseslər getməlidir. Nəticədə səthə çıxan güclü maqnit sahələri onun aktivliyini bərpa edir. Biz müşahidələrdə Günəşin səthində belə güclü maqnitləşmiş oblastları qara ləkələr kimi görürük. Çünki bu oblastların temperaturu ətraf mühitdən xeyli az olur. Günəş və onun ətrafında planetar sistem (o cümlədən də Yer kürəsi) yaranandan, yəni 4 milyard ildən çoxdur ki, Günəşdə bu periodik hadisə təkrarlanır. Təxminən hər 11 ildən bir Günəşin aktivliyi minumum, daha sonra maksimum dövürdə olur. Bəzən bu dəyişilmə prosesi 9-dan 12 ilə kimi çəkə bilir”.

N.Cəlilovun sözlərinə görə, Yerdəki həyat, insanlar, bitkilər Günəşin bu periodik fəallığına adaptasiya olublar. Buna görə də Günəşin hansı dövürdə olmasının Yerə elə də ciddi təsiri olmur: “Günəşin “gecikən” minimum aktivlik dövrü başa çatacaq. Bundan sonra növbəti 11 illik dövr 2031-cu ilə kimi davam edəcək. Bu prosesə kənardan – qalaktikadan müdaxilənin ehtimalı demək olar ki, yoxdur. Milyard illərdir ki, davam edən bu dövrülük Günəşin öz daxili fəaliyyəti ilə bağlıdır".
Direktor qeyd edib ki, Günəşin aktivliyinin qlobal minumumu yerdəki həyat və insanlar üçün böyük təhlükəyə malik olmur: “Növbəti günlərdə baş verən maqnit qasırğaları o qədər zəif olacaq ki, biz onu hiss etməyəcəyik. Buna görə də narahatlıq üçün heç bir əsas yoxdur ".