Bu ölkədə nənələr və valideynlərin dostları analıq məzuniyyətinə çıxa biləcəklər

İsveçdə nənələrə, babalara və ailə dostlarına valideyn məzuniyyətinə icazə verilir.

Lent.az-ın xarici KİV-ə istinadla məlumatına görə, artıq analar və atalar 45 günlük ödənişli valideyn məzuniyyətini qohum olmayanlara və ya qəyyumlara köçürə bilərlər. Valideyn uşağı tək böyüdürsə, ona ayrılan 480 gündən 90 gün analıq məzuniyyəti vermək hüququ var.

Hökumət hesab edir ki, bu yolla isveçlilər şəxsi həyat, iş və ailə arasında tarazlıq tapa biləcəklər.

Müavinət almaq üçün “müvəqqəti qəyyum” uşağa qulluq sığortası almalıdır. Pensiyaçılar üçün analıq məzuniyyəti kompensasiyasının məbləği pensiyanın ölçüsünə əsasən hesablanacaq.

Həmçinin, iyulun 1-dən isveçli valideynlər “ikiqat günlərin” sayını (hər iki valideynin eyni vaxtda valideynlik məzuniyyətinə gedə biləcəyi zaman) 30-dan 60-a qədər artırıblar.

1974-cü ildə İsveç dünyada ilk olaraq analar üçün ödənişli analıq məzuniyyətini tətbiq edib və 1995-ci ildə bir neçə aylıq analıq məzuniyyəti atalar üçün ayrılıb. İsveç Sosial Sığorta Agentliyinin məlumatına görə, indi 2017-ci ildə doğulan uşaq atalarının yalnız 17 faizi analıq məzuniyyətindən istifadə etməyib.