Daha bir keyfiyyətsiz dondurma sexi aşkarlandı

Lent.az-ın nazirliyin rəsmi saytına istinadən məlumatına görə, qəsəbədə Əli Bala Əlizadəyə məxsus istehsalat sahəsində aparılan yoxlama zamanı dondurmaların müvafiq reseptura olmadan istehsal edildiyi və məhsulların üzərində normativ-texniki sənədin nömrəsinin düzgün göstərilmədiyi aşkar olunub.

Bundan başqa, istehsalat sahəsində dondurmaların müvafiq keyfiyyətdə sabit istehsalı üçün uyğun şəraitin, habelə istehsal edilən məhsulların keyfiyyət və təhlükəsizliyinə nəzarətin həyata keçirilməsi üçün müvafiq laboratoriyanın olmadığı və dondurmaların laborator müayinədən keçirilmədən satışa çıxarıldığı müəyyən edilib.

Müəssisədə istehsal edilən hazır məhsullardan nümunələr götürülərək laborator müayinəyə göndərilib.

Qanun pozuntuları ilə əlaqədar dondurma istehsalının, habelə yoxlama zamanı aşkar edilmiş 210 kq dondurmanın satışının dayandırılması və müəssisə tərəfindən ticarət şəbəkəsinə paylanmış həmin məhsulların geri yığılması barədə Antiinhisar Siyasəti və İstehlakçıların Hüquqlarının Müdafiəsi Dövlət Xidməti tərəfindən Əli Bala Əlizadəyə icrası məcburi göstəriş verilib.

Araşdırmalar davam edir.