4.256.600 nüsxə dərslik və müəllim üçün metodik vəsait çap olunub

Dərsliklər çap olunmazdan əvvəl Dərslikləri Qiymətləndirmə Şurası tərəfindən qiymətləndirilib

2009-2010-cu tədris ilinə respublikamızın ümumtəhsil məktəblərinin II və V-XI sinifləri üçün (təlim Azərbaycan və rus dillərində) 87 adda 4.256.600 nüsxə dərslik və müəllim üçün metodik vəsait çap olunub.
Lent.az-ın Təhsil Nazirliyinin rəsmi internet saytına istinadən verdiyi məlumata görə, bu sıraya II siniflər üçün kurikulum əsasında 40 adda 1.112.500 nüsxə dərslik və müəllim üçün metodik vəsait, V-XI siniflər üçün isə 47 adda 3.144.100 nüsxə dərslik daxildir.
Prosedur qaydalara uyğun olaraq Dərslikləri Qiymətləndirmə Şurası tərəfindən qiymətləndirildikdən sonra keçid balını toplayan dərslik komplektləri çapa verilib. Yeni dərs ilinə qədər dərsliklər bütün ümumtəhsil məktəblərinə çatdırılacaq.