Putindən Trampla bağlı gözlənilməz AÇIQLAMA

Vladimir Putin Astanada jurnalistlər qarşısında çıxış edərkən Donald Trampı xatırladıb. KİV nümayəndələrinin bəzi sualları Amerikanın yeni seçilmiş prezidentinin 24 saat ərzində başa çatdıracağına söz verdiyi Ukraynanın Rusiya ilə müharibəsi ilə bağlı olub.

Lent.az bildirir ki, bu barədə CNN məlumat yayıb.

Jurnalistlərin suallarını cavablandıran Putin, ABŞ-ın seçilmiş prezidenti Donald Trampı Ukraynadakı müharibə səbəbiylə Moskva ilə Qərb arasındakı gərginlik şəraitində "qərar" verə bilən "ağıllı və təcrübəli" siyasətçi adlandırıb. Lakin Kremlin rəhbəri ABŞ-ın hazırkı prezidenti Co Baydeni tənqid edərək bildirib ki, onun qərarları Trampın gələcək administrasiyası üçün "əlavə çətinliklər" yaradır. Bu, xüsusilə Baydenin Ukrayna qüvvələri tərəfindən Rusiya ərazisinə zərbələr endirmək üçün ABŞ-ın uzun mənzilli ATACMS raketlərindən istifadə etməsinə icazə verilməsinə aiddir.

Nəşr yazır ki, Rusiya lideri Moskvanın Ukraynanın kritik enerji infrastrukturuna son genişmiqyaslı hücumdan sonra nüvə yükü daşıya bilən "Oreşnik" ballistik raketindən istifadə edərək Ukraynaya yenidən zərbə vura biləcəyi barədə xəbərdarlıq edib.

Putindən Baydenin qərarının Moskva ilə Vaşinqton arasındakı münasibətlərə təsir edib-etməyəcəyi soruşulduqda, Trump yanvar ayında vəzifəyə gəldikdən sonra vəziyyətin müsbət istiqamətdə dəyişə biləcəyinə ümid etdiyini bildirib.

"Təsəvvür etdiyim kimi, yeni seçilmiş prezident ağıllı və təcrübəli bir insandır. Düşünürəm ki, bir həll tapacaq", - o deyib.