Oqtay Kazımi yad edildi

Tanınmış bəstəkar Oqtay Kazıminin 80 illiyinə həsr olinmuş, ailə üzvlərinin təşəbbüsü, millət vəkili Qənirə Paşayevanın və əməkdar artisti Aybəniz Haşımovanın ideya müəllifi olduğu musiqili layihənin təqdimatı keçirilib. Lent.az-ın məlumatına görə, yubiley günü ilə bağlı bəstəkarın musiqiləri əsasında hazırlanmış ''Ağla mənim üçün bu şəhər və sən'' adlı konsert proqramı təşkil olunub. Gecədə ölkənin tanınmış ziyalıları, ictimaiyyət nümayəndələri, sənət adamları, Oqtay Kazıminin ailə üzvləri və yaxınları, KİV nümayəndələri iştirak edib.

Tədbiri əməkdar artist Aybəniz Haşımova giriş sözü ilə açıb. Müğənni bildirib ki, Oqtay Kazımi ona sənətdə də, həyatda da atalıq edib. Qənirə Paşayeva isə çıxışında bildirib ki, o, dünya səviyyəli böyük bəstəkar Oqtay Kazımini yaxından tanımaq şərəfində nail olduğu üçün özünü xoşbəxt hiss edir: “Oqtay müəllim böyük bəstəkar, böyük insan idi. Saf, səmimi, dürüst, mehriban, insanı anlayan... Oqtay müəllimin musiqilərinə söz yazmaq mənim üçün böyük şərəf olmaqla bərabər böyük bir məsuliyyət idi. Çünki bu musiqilər hazır musiqilər idi və onları dahi Oqtay Kazımi yazmışdı”.

Ailə adından Oqtay Kazıminin nəvəsi Çinarə Kazımi çıxış edərək babası haqqında xatirələrindən danışıb və layihəni həyata keçirənlərə təşəkkürlərini çatdırıb. Aybəniz Haşımova, Gülyanaq Məmmədova, Firuzə İbadova, Ayaz Qasımov və Aynişan Quliyeva bəstəkarın mahnılarını ifa ediblər. “Dan ulduzu” ansamblının və pianoçu Naibə xanımın ifaları alqışlarla qarşılanıb.