Ali Məhkəmədən Meydan TV ilə bağlı YENİ QƏRAR

Ali Məhkəmədə Meydan TV-yə blok qoyulması ilə bağlı verilən qərardan kassasiya şikayətinə baxılıb.

Lent.az-ın məlumatına görə, vəkil Elçin Sadıqov APA-ya bildirib ki, bu gün hakim Elşad Şamayevin sədrliyi ilə keçirilən prosesdə qərar elan olunub.

Qərara əsasən, şikayət təmin edilməyib və qətnamə qüvvədə saxlanılıb.

Qeyd edək ki, Səbail Rayon Məhkəməsi Nəqliyyat, Rabitə və Yüksək Texnologiyalar Nazirliyi yanında Elektron Təhlükəsizlik Mərkəzinin iddiası əsasında 2017-ci il mayında "Azadlıq" qəzeti, "Azadlıq Radiosu", "Azərbaycan Saatı" proqramı, Turan TV və Meydan TV-nin saytının bloklanması barədə qərar çıxarıb.

Bakı Apelyasiya Məhkəməsi həmin qərardan verilən şikayəti təmin etməyib.

Ali Məhkəmədə 2019-cu ildə verilmiş qərara əsasən, əsasən, Meydan TV-yə blok qoyulması ilə bağlı qərar ləğv edilərək yenidən baxılması üçün Bakı Apelyasiya Məhkəməsinə göndərilib.

Lakin məhkəmədə iddia yenidən təmin olunub və Meydan TV-nin ölkədə yayımına blok aradan qaldırılmayıb.